“Que pasa cando a vida non ten nada que ver con aquilo que nos mostraron?”.
A compañía VAIEMBORA estrea mañá a súa primeira produción, Cariño, na Sala Ártika, en Vigo. A peza realiza unha viaxe para cuestionar os referentes actuais do amor romántico, os celos e a posesión dentro dunha parella adolescente. Trátase dunha posta en valor de aqueles sentimentos que marcan a vida e aos que ninguén lles presta atención porque son “cousas da rapazada”.
Cariño está baseado no relato “Sara”, da nova edición do libro Invisibles de Montse Fajardo. Os outros relatos xa foron levados á escena no ano 2018 pola compañía galega Redrum Teatro, acadando tres premios María Casares e o II Concurso de Ideas Luísa Villalta de proxectos pola Igualdade.
O espectáculo ten a Sara como protagonista, que, deixando o vitimismo e o sentimentalismo á parte, fai autocrítica e análise da relación que a levou cara ao fondo do precipicio e do que conseguiu volver grazas á axuda psicolóxica e aos autocoidados.
Cariño estréase mañá, venres, e estará ata o domingo na sala viguesa, con funcións o sábado e o domingo, ás 20.00 horas. VAIEMBORA é unha compañía de teatro galega de nova creación, nada en Vigo neste mesmo ano 2021, e esta primeira montaxe é unha coprodución co Centro Dramático Galego e conta co apoio do Concello da Coruña.
Ficha artística:
Dramaturxia e dirección: Diego Chamizo
Texto orixinal: Montse Fajardo
Interpretación: Grial Montes
Escenografía: Carmen Casal e María Torres
Iluminación: Violeta Martínez
Vestiario e deseño gráfico: David Vila
Caracterización e asistencia de vestiario: Alberte Bello
Coreografía e asistencia de interpretación: Sofía Rodal
