Nunha cerimonia celebrada o sábado 21 de outubro de 2023, no Teatre des Born de Ciutadella de Menorca, a presidenta do Cercle Artístic de Ciutadella, entidade organizadora e promotora do Premi Born de Teatre, Lina Pons Massanet, e as secretarias do Premi Born, Rosa Gornés Gomis y Roser Garcia, deron a coñecer a obra gañadora da XLVIII edición, a que se presentaron 245 textos, procedentes de 23 países distintos.
O xurado da XLVIII edición do Premi Born, en 2023, decidiu, por unanimidade, concederlle este galardón a Y que nunca he llorado de Miguel Ángel González González.
Empar Canet, actriz de teatro, cine e televisión; Josep Ramon Cerdà, dramaturgo, director teatral, xestor cultural e profesor de lingua e literatura; Laurent Gallardo, profesor de estudos hispánicos e cataláns da Universidade de Grenoble Alps; Laura Pons, actriz de teatro, cine e televisión, e Jaume Gomila, filólogo, profesor e xestor cultural, licenciado en Música e Teatro e posgrao en estudos literarios pola Universidade de Barcelona, como xurado desta edición, sinalaron, respecto á obra gañadora, Y que nunca he llorado, a gran sensibilidade coa que reflexiona sobre a imposibilidade de escribir, o dominio do xogo entre a realidade e a ficción, a teatralidade minimalista grazas á que consegue transmutar o fracaso do creador nun profundo acto de escritura que celebra a fraxilidade humana da literatura, entre outros aspectos que demostran a calidade, eficacia e contundencia do texto.
Miguel Á. González (Madrid, 1982) é escritor e dramaturgo, facetas nas que obtivo moitos premios e aclamación da crítica. Compaxina o seu traballo literario con colaboracións xornalísticas en medios dixitais e impresos, e coa coordinación de obradoiros de creación literaria e clubs de lectura.
En 2016 publicou a novela Todos los miedos, editada por Siruela e gañadora da 65 edición do Premio Café Gijón. Posteriormente, escribiu Cariño (Alianza Editorial, 2018), que foi elixida como unha das dez mellores novelas do ano pola revista Forbes; Un nublao de tiniebla y pedernal (2021), coa que gañou o Premio Ciudad de Alcalá de Narrativa. E en 2022 publicouse Prolepsis, novela editada por Alrevés e galardoada co XXV Premio de Novela Ciudad de Badajoz.
En xaneiro de 2024 aparecerá a súa próxima novela, titulada Perder el equilibrio, que publicará Grijalbo, do grupo editorial Penguin Random House.
Como dramaturgo tamén foi recoñecido co Premio Fray Luis de León e o Premio Max Aub. Os seus textos teatrais representáronse en diferentes teatros de España, Arxentina, México e Estados Unidos.
Dentro dos actos do XLVIII Premi Born de Teatre 2023 incluíse, o venres, 20 de outubro, na Sala Jeroni Marquès do Cercle Artístic de Ciutadella, a presentación das edicións da peza gañadora do ano pasado, El gos de Lluïsa Cunillé Salgado, traducida ao galego por Afonso Becerra de Becerreá e publicada no volume número 4 da colección de dramaturxia contemporánea da erregueté. No acto, presentado polas secretarias do Premi Born de Teatre, Rosa Gornés Gomis y Roser Garcia, interviron Carlos Gil, director de Artezblai e editor da obra en castelán e éuscaro e Afonso Becerra, director da erregueté.
