Con Quintana de Vivos Experience arrancará mañá, 8 de outubro, en Santiago de Compostela, o Festival Internacional de Improvisación de Galicia, Imperdible. Trátase dunha improvisación de creación colectiva inspirada nos MP3 Experiments do colectivo de Nova York Improv Everywhere, e creada especialmente para a capital galega. Con esta actividade a Praza da Quintana converterase a partir das 19:00 horas nun escenario onde as persoas participantes formarán parte dunha gran creación efémera. A través duns auriculares, unha voz guía proporá xogos, retos, movementos e situacións inesperadas que transformarán progresivamente o entorno nun organismo vivo. Será “un experimento colectivo onde a cidade, o azar e a imaxinación escribirán xuntos unha única función que só acontecerá unha vez”.

Sorpresas improvisadas

Durante dez días, ata o vindeiro 18 de outubro, o Festival Imperdible funcionará como escaparate da improvisación nas súas múltiples formas, con actividades que se desenvolverán en Santiago de Compostela e en Ames. Espectáculos, obradoiros e accións de rúa conformarán unha programación que busca seguir consolidando este evento dentro do panorama das artes escénicas de Galicia.

Nesta sexta edición o Festival segue apostando pola improvisación teatral como eixo vertebrador do festival e, ademais, amplía a mirada cara a outras disciplinas artísticas. Así, a improvisación tamén estará presente en propostas de música, danza ou regueifa, configurando “unha programación máis aberta e transversal pensada para conectar con públicos diversos e interxeracionais, especialmente co público novo”, segundo poñen en valor dende a organización do evento.

A programación

Woman Up! será un dos pratos fortes desta edición. Este espectáculo internacional de improvisación reunirá en Santiago de Compostela a Lucía Veiga, nomeada ao Goya á mellor actriz revelación en 2025 por Soy Nevenka; Susana Sampedro, gañadora do Mestre Mateo á mellor interpretación feminina de reparto en 2024 por Matria; Ana Puerta, da compañía granadina La Tetera; e a Paula Galimberti, fundadora da compañía Jamming. Desde o humor e a emoción, Woman Up! aborda as experiencias compartidas das mulleres ao longo das súas traxectorias vitais.

Pola súa banda o actor, guionista e director Miguel Canalejo, xunto coa tamén actriz Antía Vidal, impartirán “un obradoiro de improvisación en estilo thriller rural, dirixido a doce destacados improvisadores galegos procedentes de varias cidades”. Neste laboratorio, o traballo xirará arredor do suspense e do thriller, explorando a través da improvisación as personaxes e as características propias deste xénero cinematográfico. O obradoiro culminará coa exhibición do espectáculo Nun lugar onde nunca pasa nada na Sala Capitol.

A comedia absurda participará da man de Ángel Cantizani, da compañía madrileña Al Tran Tran, referente da improvisación musical en España. Co seu show Pepino aborda o tema do proceso de creación dun espectáculo en directo, así como as expectativas e fracasos asociados á creación artística.

Ademais, o festival reforzará este ano a súa dimensión internacional coa presenza de Coqueluje Teatro de Improviso, colaboradora de Barbixas, unha das compañías de improvisación e comedia máis coñecidas do Brasil. O seu espectáculo LÁ está inspirado no universo literario d’As Cidades Invisibles, do escritor italiano Italo Calvino.

A formación xoga tamén un papel fundamental dentro do Festival Imperdible, cun programa que abrangue dez obradoiros con profesionais da improvisación. Nestes espazos poderase aprender a improvisar en rima con Víctor Ruíz, membro da compañía galega Improversados; ou a xogar co xesto e co corpo como motores creativos da man do improvisador e artista de circo Arturo Cobas. Tamén haberá espazo para practicar e profundar na improvisación tradicional galega grazas á clase de regueifa coa filóloga e cantante Alba María.

Podes consultar aquí a programación completa do IV Festival Imperdible.