O novo traballo de creación e mediación cultural desenvolvido pola compañía ButacaZero con adolescentes de Vigo, 1972, abre esta semana as súas portas á cidadanía con dúas actividades gratuítas. Ambas xiran arredor da folga xeral que paralizou a cidade olívica durante quince días en setembro de 1972, un dos episodios máis relevantes da loita obreira da época franquista.
A primeira cita será hoxe, xoves 8 de outubro, ás 19:00 horas, no Museo de Arte Contemporánea de Vigo (MARCO). O edificio, que daquela era un cárcere, acolle cada semana desde setembro os encontros formativos do proxecto. Alí terá lugar esta tarde o Conversatorio Interxeracional, unha conversación aberta ao público na que o grupo de adolescentes dialogará con persoas vinculadas ás protestas de 1972 para avanzar na súa investigación escénica. A entrada é gratuíta e de acceso libre ata completar a capacidade do espazo.
O domingo, 11 de outubro, pola mañá, o proxecto sairá á rúa cun roteiro en autobús pola memoria obreira de Vigo. O percorrido irá desde PSA-Citroën, un dos epicentros da loita sindicalista, ata A Madroa, onde tiñan lugar as reunións nocturnas dos comités que debatían a continuidade da folga. A actividade é gratuíta, pero as prazas son limitadas e é necesario inscribirse previamente no correo electrónico info@butacazero.com.
O proxecto
Desde setembro, un grupo de adolescentes de Vigo investiga a folga de 1972 para convertela nunha peza escénica propia. O proceso formativo multidisciplinar está dirixido por Esther F. Carrodeguas e Xavier Castiñeira, que contan co acompañamento de Laura R. Iturralde, Clara Ferrao, Juanma LoDo, Borja Carvajal e Pia Nicoletti. Nel, a mocidade traballa danza contemporánea, sonorización, deseño audiovisual, iluminación, dramaturxia documental e creación colectiva. O conversatorio e o roteiro forman parte dese proceso de investigación, no que colaboran tamén entidades como a Unión Comarcal CCOO de Vigo ou a Fundación 10 de marzo.
“A idea é organizarse colectivamente para ‘bailar a loita’, e que revivan cos seus corpos e voces a enerxía e o espíritu dun episodio do noso pasado do que non quedou unha soa imaxe para a posteridade”, explica Carrodeguas.
As dúas actividades preceden a mostra final do proceso, que se presentará os días 12 e 13 de novembro na Sala Ártika, localizada na zona portuaria de Vigo, escenario dos paros de 1972. A entrada será de balde, previa retirada de convites na páxina web da sala, ata completar a capacidade do espazo.
1972 é, á súa vez, un dos nove proxectos de creación escénica de Barrios en lucha, un programa desenvolvido e coordinado por Teatro del Barrio para o Comisionado para la Celebración de los 50 años de España en libertad.
Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.
A única publicación periódica que ten como obxecto as artes escénicas galegas dende 1983.
Latest posts by Redacción (see all)
