A Mostra Internacional de Teatro de Ribadavia presentou hoxe a programación da súa 34ª edición que terá lugar do 14 ao 22 de xullo. A comedia musical e as linguaxes híbridas da escena actual son as liñas mestras do cartel desta nova edición que ofrece 21 representacións e un reforzo na oferta de espectáculos de rúa. Commedia, un xoguete para Goldoni de Cándido Pazó será o espectáculo inaugural mentres que a compañía inglesa Blind Summit Theatre será a encargada de clausurar o programa con The Table.

Vintecinco anos despois da súa estrea na MIT, Ribadavia volve a acoller a estrea de Commedia, un xoguete para Goldoni, un fito do teatro galego revisitado por Cándido Pazó. Entre a creación galega, destaca tamén a presenza de Elisa e Marcela, unha comedia musical na que A Panadaría reconstrúe a historia de amor entre as dúas mestras que casaron en A Coruña a inicios do século XX e que conta, entre outros, co premio ao mellor espectáculo María Casares. De igual xeito, continuando coa liña musical, o programa da MIT 2018 inclúe a versión do conto O gato con botas, que Cristina Collazo presenta da man da compañía A cova das letras baixo o título A gata con zocos e que contará co acompañamento musical en directo da Banda La Lira de Ribadavia.

No apartado internacional, cómpre destacar a presenza de referentes do panorama escénico actual como son o italiano Pippo Delbono, a creadora uruguaia Marianella Morena, a compañía mexicana Los Colochos e a compañía inglesa Blind Summit Theatre.  Despois do seu paso pola MIT con Raconti di giugno, o italiano Pippo Delbono, regresa neste 2018 con La Gioia, un espectáculo visual e conceptual a partir da idea de felicidade.  Pola súa parte, Marianella Morena ofrece en Ella sobre ella [foto] un traballo escénico realizado a partir da personaxe histórica Carlota Ferreira (1838-1912) nunha peza que transita por diferentes técnicas contemporáneas que van desde a escena teatral, a música, a performance e as artes visuais. De igual xeito, a compañía mexicana Los Colochos achegan Mendoza ao Auditorio do Castelo. Gañador do Premio AlmagroOFF en 2014, musical e  festivo, Mendoza é un proxecto que nos traslada s tempos da Revolución Mexicana e que se realizou facendo ensaios en casas de persoas sen relación directa co feito teatral. Por último, The Table, de Blind Summit é un espectáculo multipremiado de marionetas épicas, inspirado por Beckett, a Biblia e IKEA nun proxecto único que ofrece unha singular demostración da arte do títere e da improvisación coa marioneta.

Do conxunto do Estado, a MIT acolle unha escolma de traballos escénico en diversos formatos nos que se combina o circo, o teatro musical, o teatro documento, o drama ou a comedia. Así, arredor da historia, a memoria e a escena creada a partir de feitos reais, é preciso sinalar espectáculos como Ragazzo, da catalana Lali Álvarez; Donde el bosque se espesa, o novo espectáculo de Laila Ripoll -enmarcado no proxecto europeo HORIZON 2020 e UNREST para a memoria e a cohesión social transnacional europea- ou a peza Tebas Land, un texto do franco-uruguaio Sergio Blanco baixo a dirección de Natalia Menéndez.

Ademais dos espectáculos do Castelo, a MIT 2018 ofrece un conxunto de espectáculos de rúa avalados por unha importante nómina de premios e recoñecementos. Así, entre outros, desde a Comunidade Valenciana La Trocola, chega o espectáculo de circo e obxectos Emportats (Premio Feten 2018); de Andalucía, La Nórdika presenta Rojo estándar, un traballo no que a danza se fusiona co circo Rojo Estándar; de Asturias, Rodrigo Cuevas con El mundo por montera ou, desde Extremadura, Fuman Artist presenta Musicoloco. De Galicia, presentarán o seu traballo os galegos Io Circo con Contiguo e Inventi Teatro con  A tropa do Doutro Milagre, mentres que, chegado de Portugal, projecto EZ percorrerá as rúas co seu submarino. 

O programa, que certifica o compromiso asinado na anterior edición coas Tempadas de Igualdade (coa presenza de creadoras como A Panadaría, De Vacas, Marianella Morena, Natalia Menéndez, Laila Ripoll, Cristina Collazo, La Nórdika ou Lali Álvarez), complétase con cursos, obradoiros, concertos, conferencias, presentacións de libros e espectáculos en diferentes zonas do rural dentro do espazo SputMIT, para poñer en valor a arte no marco do Ribeiro.

A venda de entradas comeza o día 15 de xuño a través da páxina web de Ataquilla e na oficina do festival (Praza Maior de Ribadavia) a partir do 9 de xullo.

Toda a información na web da MIT de Ribadavia.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos