Actualidade

PUBLICIDADE

Ourense estreou este pasado sábado un museo dedicado ao Circo de los Muchachos, o primeiro circo escola de España. O novo museo está situado na rúa Bailén do centro ourensán e foi promovido pola Asociación Cultural Padre Silva.

O novo museo custodia fotografías, cartelaría, vestiario e diversos recordos do circo e do “universo” coñecido como Ciudad de los Muchachos. O material procede de diferentes coleccións particulares e das delegacións de Bemposta que existen noutros lugares do mundo, como Mozambique, Venezuela, Bélxica ou Xapón. A inauguración tivo lugar este sábado nun acto presentado pola comunicadora Montse Estévez.

O Circo de los Muchachos foi creado na década de 1960 por Jesús Silva Méndez, coñecido como o Padre Silva, nos arredores de Ourense, na parroquia de Siexalbo. Silva construíu alí unha especie de sociedade utópica durante a ditadura franquista, baseando a convivencia na escola nunha “democracia” de corte cristiá. O proxecto tiña como obxectivo promover o desenvolvemento dos mozos e mozas a través da defensa dos dereitos da infancia: todos eran considerados cidadáns con idénticos dereitos. Os propios nenos e nenas ocupaban os cargos de responsabilidade con carácter rotatorio, o que convertía Bemposta nunha especie de territorio independente que contaba con escolas, banco, igrexa, supermercadoe mesmo con moeda propia.

O Circo de los Muchachos converteuse nun dos máis recoñecidos a nivel mundial e terminou por se expandir a países como Venezuela e Colombia. Viaxou por todo o planeta, foi o primeiro circo en actuar no Grand Palais de Paris, comezou unha xira polo continente americano no Madison Square Garden de Nova York e, debido á ideoloxía que o guiaba, foi prohibido pola ditadura arxentina a finais da década de 1970.

A asociación presente o museo como un primeiro paso de cara á reactivación desta iniciativa, e pretende continuar a divulgación do legado do padre Silva coa organización de visitas escolares ao centro e o desenvolvemento dun congreso universitario sobre o proxecto.

A Asociación Cultural Padre Silva proxecta visitas guiadas de escolares de toda Galicia e a organización dun congreso sobre Bemposta nun futuro próximo.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos