Actualidade

PUBLICIDADE

A programación das Festas de Ourense aposta polo teatro de rúa, con doce funcións que dende hoxe e ata o día 29 achegarán ao público da cidade sete espectáculos. Todas as funcións serán na Alameda do Bispo Cesáreo.

 

O programa ábrese hoxe, día 24, ás 12:00 e ás 20:00, coa compañía Duelirium e a súa obra O que queda por chover, un espectáculo que fala do paso do tempo de dúas mulleres: a infancia, a adolescencia, a madurez son puntos polos que transcorre esta simpática e positiva historia. Espectáculo dinámico e visual. Trapecio, pirámide, corda, acrobalance ou clown, como técnicas circenses.

Mañá, martes 25, ás 12:00 e ás 20:00, o mago Kayto, de Madrid, presentará Alokayto, un espectáculo de maxia, clown e globoflexia para toda a familia. Un show moi participativo no que o mago Kayto interactúa coa cativada facendo que sexa a verdadeira protagonista do espectáculo.

O mércores 26, ás 12:00 e ás 20:00, Francis Zafrilla (Castela A Mancha) transformarase en Mr. Happy, un show que reúne multitude de disciplinas como a música en directo, malabares, ventriloquia e maxia. Disciplinas que Mr. Happy non domina nin por casualidade! Pero polo menos inténtao, creando situacións disparatadas e xerando unha comedia familiar diferente.

O xoves 27, Vueltos de Rosca representarán Totum revolutum ás 12:00 e ás 20:00, unha disparatada viaxe autobiográfica a través das diferentes modalidades de circo, na que dous excéntricos personaxes chegarán a amosarnos un novo estilo: o circo contemporáneo na rúa.

O venres 28, a compañía catalá Infoncundibles traerá Que raro, verdade?, un espectáculo que, a partir do humor, pregúntase sobre o que é raro e o que non. Moi normal non é dedicarse ao circo, e menos aínda que dous irmáns se compenetren para realizar xogos de malabares do máis complexo. Non é normal complicarse a vida de certo xeito para pasar un vaso de auga dun sitio a outro. Talvez e circo contemporáneo, ao que se lle dá un repaso de arriba a abaixo, non sexa precisamente o máis normal do mundo. Ás 12:00 e ás 20:00.

O sábado 29, ás 12:00, é a quenda de Dona Barriga Verde, espectáculo de Larraitz Producións Artísticas que supón unha actualización das formas e dos xeitos do clásico personaxe dos monicreques de cachiporra, achegando unha protagonista feminina que, sen perder os gags clásicos, fomenta novas visións aos roles de xénero e aos estereotipos dos monicreques.

Finalmente, ese mesmo día 29, ás 20:00, Inacio Vilariño presentará Os romeiros do caracol: os irmáns Quintá percorren o camiño de volta de San Andrés de Teixido á súa casa despois de cumprir a ofrenda que lle prometeran ao seu defunto avó de levalo a San Andrés en forma de caracol, xa que non fora de vivo. A sabendas de que o camiño ía ser lento viaxan nunha caravana-caracol que tamén serve de teatriño de títeres co que contan as historias e cancións que viron e escoitaron en San Andrés.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos