Actualidade

Palmarés da XXXVI Mostra De Teatro de Cangas

PUBLICIDADE

A Companhia do Chapitô recunca no Premio do Público coa súa versión de Electra.
| Foto: ProLight Foto Estudio |

 

A XXXVI Mostra Internacional de Teatro Cómico e Festivo de Cangas clausurouse este pasado sábado 6 coa entrega do Premio Xiria á compañía Os Monicreques de Kukas polo “seu intenso labor artístico e teatral que, ao longo de 40 anos, abriu anovadores camiños tanto coa creación de inusitadas marionetas e monicreques como coa importante difusión, en lingua galega, dese particular universo que supuxo unha auténtica revelación para nenas, nenos e público adulto deste país”. A MITCFC considera que este premio é sobradamente merecido porque actualmente “son un indiscutible referente”.

O dramaturgo Zé Paredes foi o gañador do III Torneo de Dramaturxia de Galicia, celebrado o día 3 e que se consolida como unha das grandes citas anuais da Mostra, unha aposta firme da MITCFC para dar a coñecer a dramaturxia galega, creando un nexo directo entre autoras/es e público. Este proxecto, pioneiro en Galicia e que este año chega á súa terceira edición, conta coa imprescindible colaboración de DramaturGA, a primeira asociación profesional da dramaturxia galega.

A Electra da Companhia do Chapitô foi a gañadora do Premio do Público. A Companhia do Chapitô, con 36 creacións orixinais ás súas costas dende 1996, explora o estilo da comedia visual e física que invita á imaxinación do público, recibido numerosos premios recoñecidos en escenarios de todo o mundo. A compañía xa gañara este premio en 2014, pola súa versión de Macbeth.

Na inauguración da Mostra xa se lle entregara o Premio Mulleres en Acción á cantautora María Xosé Silvar, máis coñecida como Sés. A dirección da Mostra outórgoulle este premio “en recoñecemento ao seu espléndido labor artístico, compromiso e discurso a prol da igualdade e empoderamento das mulleres, labor que a converte nun referente para centos de nenas e nenos que tanto necesitan exemplos de mulleres libres que non hipotecan o seu éxito artístico a unha imaxe sexualizada ou estereotipada de si mesma senón á súa música e ás súas ideas”.

 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Relacionado

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!