Actualidade

Escena Galega rexeita o abandono do Festival de Teatro de Ourense por parte do Concello

PUBLICIDADE

Escena Galega, a Asociación Galega de Empresas de Artes Escénicas, vén de facer público un comunicado no que amosa o seu rexeitamento á decisión do Concello de Ourense de retirarlle o apoio ao Festival Internacional de Teatro de Ourense (FITO). O posicionamento de Escena Galega súmase así á desaprobación tamén manifestada pola AAAG (Asociación de Actores e Actrices de Galicia), pola AELG (Asociación de Escritores en Lingua Galega) e por unha gran parte da profesión teatral, que se ten pronunciado nos últimos días en contra da polémica decisión do Concello de Ourense, que pon en perigo a continuidade do FITO.

A Asociación subliña que o FITO é “un festival consolidado dentro do calendario cultural ourensán -e por suposto, galego- e desde os seus comezos oferta programación escénica artellada por espectáculos de compañías galegas, mais tamén estatais e internacionais”. Chama ademais a atención sobre a inxente actividade do Festival nos campos do debate, a formación e a reflexión sobre a profesión teatral, un traballo que dinamiza a axenda cultural da cidade”.

Segundo Escena Galega, “ao longo destas once edicións, o Festival de Teatro de Ourense ten contado co apoio, patrocinio e colaboración de institucións como a Xunta de Galicia, a Deputación de Ourense e o propio Concello, independentemente da cor política dos mesmos”. Por esa razón rexeita “frontalmente a determinación do novo equipo de goberno municipal, liderado por Gonzalo Pérez Jácome, de desatender unha iniciativa como esta”.

A falta de colaboración do consistorio interprétase como “unha falta de sensibilidade -mais, sobre todo, de interese- por achegar á cidadanía o abano de programación cultural que lle corresponde á terceira cidade de Galicia”.

A Xunta Directiva da Asociación, ademais, “quere por de manifesto o apoio aos integrantes de Sarabela Teatro e recoñecer o seu labor no eido das artes escénicas, así como o seu afán constante por facer do teatro algo bo, vivo, arriscado e coherente” e agradecer “a súa vontade e iniciativa para dinamizar o sector dun xeito profesional, sendo promotora de certames como o FITO que, a pesar de ter deixado de contar coa participación do Concello ourensán, continúan a traballar na máis que necesaria creación de públicos”.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!