Voadora estreará en 2021 a adaptación transgresora do Othello de Shakespeare baixo a dirección de Marta Pazos. A compañía galega prepara nesta primavera o seu terceiro espectáculo baseado na obra de William Shakespeare, despois de O soño dunha noite de verán e A tempestade.

 

A obra, producida pola propia compañía, dará especial relevancia aos personaxes femininos. Así, o novo traballo de Voadora ofrecerá unha perspectiva na que as personaxes de Desdémona, Emilia e Bianca serán principais, mentres que os papeis de Othello e Iago adoptarán un rol secundario. “Será un espectáculo transgresor, dotado de intencionalidade e que, tal e como é habitual no noso traballo, contará cun compoñente musical moi importante”, sinala a directora e escenógrafa, finalista dos International Opera Awards coa ópera bufa Je suis narcissiste.

Othello será o terceiro encontro da compañía co dramaturgo inglés ao longo da súa traxectoria. No ano 2014, Voadora propuxo unha reinvención de A tempestade outorgándolle elementos musicais e cómicos. A segunda ocasión na que levou a escena a Shakespeare foi en 2017 coa comedia O soño dunha noite de verán, coa versión do chileno Marco Layera ao redor do transxénero. O próximo ano, Voadora regresará á traxedia clásica cunha adaptación na que a posverdade e a violencia de xénero serán os grandes temas sobre os que xirará o espectáculo teatral, que contará co encontro de disciplinas artísticas e linguaxes contemporáneas que definen o traballo de Voadora.

Ademais de Othello, a compañía estreará proximamente Siglo mío, bestia mía no Centro Dramático Nacional. O espectáculo, dirixido por Marta Pazos e baseado no texto de Lola Blasco galardonado co Premio Nacional de Literatura Dramática 2016, tiña prevista a súa estrea esta primavera no Teatro Valle-Inclán. A suspensión de eventos en espazos vinculados ao INAEM debido ao Estado de Alarma provocou que a estrea fose adiada. A proposta conta con José Díaz, Carlota Gaviño, César Louzán, Miquel Ínsua e Hugo Torres no seu elenco.

 

 

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos