Os Premios de Teatro María Casares rexistraron este ano a maior participación da súa historia, ao inscribirse 48 espectáculos e preto de 400 profesionais na súa 29ª edición, cuxa gala de entrega se celebrará o xoves 3 de abril no Teatro Rosalía Castro da Coruña. A cifra mellora a rexistrada na edición anterior, cando foron 47 os espectáculos e máis de 350 profesionais os concorrentes. Este novo récord nas inscricións acádase no terceiro ano en que os galardóns incrementaron os seus apartados, xa que no 2023 as bases foron modificadas para ampliar o certame ao crear dúas novas categorías: dirección de movemento e espectáculo de monicreques, obxectos e figuras animadas.

A Asociación de Actores e Actrices de Galicia (AAAG), asociación sindical que organiza os galardóns dende a súa posta en marcha en 1997 coa colaboración tradicional de institucións e entidades como a Xunta de Galicia, o Concello da Coruña, a Deputación da Coruña, o Padroado de Cultura do Concello de Narón, a Fundación Aisge, a Fundación SGAE ou Gadis, abriu onte, martes, a primeira quenda de votacións, da cal sairá a relación de finalistas que optarán aos 16 galardóns nos que se dividen os María Casares: espectáculo, espectáculo infantil, espectáculo de monicreques, obxectos e figuras animadas, dirección, dirección de movemento, actriz protagonista, actriz secundaria, actor protagonista, actriz protagonista, texto orixinal, adaptación-tradución, espazo sonoro, espazo escénico, iluminación, maquillaxe e vestiario.

Preto de 500 persoas pertencentes ao sector escénico están chamadas a emitir o seus votos de forma telemática a través da web da Asociación de Actores e Actrices de Galicia (AAAG) até o vindeiro luns 17 de febreiro nesta primeira rolda de votacións. Este censo de votantes está conformado polo corpo asociativo da propia AAAG, por gañadoras e finalistas de edicións anteriores, responsables de programación da Rede Galega de Teatros e Auditorios, xornalistas culturais e outros perfís vencellados á escena galega, segundo deu a coñecer a AAAG. A relación de finalistas darase a coñecer na primeira semana de marzo.

Espectáculos inscritos nos XXIX Premios de Teatro María Casares

	Espectáculo e compañía
1	A Cheminea do Apalpador, Jorge Rey Títeres
2	A Cuba!, Títeres Alakrán
3	A Utópica Rodante ‘De Vilatristre a Vilalegre’, Teatro ó cubo e CDG
4	A vendedora de fume, A Cova das Letras
5	A vida, un frenesí, Barafunda
6	Almar, Coiracho Producións
7	Apaga o candil, Contraproducións
8	As formas do amor, Verdeveras Expresións Artísticas e CDG
9	As gardiás ou o nó do tecelán, Teatro de Ningures
10	Boa sorte, mala fama, Tarabela Creativa
11	Bulebule, Os Náufragos Teatro
12	Cancións amarelas, flores tristes, Manekineko
13	Circo de Pinocho, Educateatro Producións
14	Cortello de Amor, Amorodio teatro
15	Desexo,Talía Teatro
16	Eu, Fraude!, Paula Pier
17	Gaia Baba, a meiga, Nauta Teatro
18	Go Home, Etiqueta Negra Producións
19	Hexagonum, Troula
20	Historias para unha man, Spaguetti Títeres
21	Iribarne, ButacaZero
22	María Visitación Consolación Amadora, Loia Producións
23	Maruxiña, Aurora Artes Escénicas
24	Moby Dick, Pedras de Cartón
25	Monstros, Producións Teatráis Excéntricas
26	Nada se sabe, Culturactiva Producións e CDG
27	Neura, unha comedia neurótico festiva, De Ste Xeito
28	Non pasarán, Ártika Cía
29	Noso, Os Náufragos Teatro
30	O Dragón de Ouro, Sarabela Teatro
31	O mundo está roto pero pódese camiñar, Contraproducións
32	O Rexurdimento do Divino Sainete, LaGriot’te
33	Os actos e as profecías, Centro Dramático Galego
34	Os contos do Lobicán, Redrum Teatro
35	Pálido Punto Azul, Javier Otero Neira
36	Penélope: destecendo o vínculo, Constance Hurlé
37	Pum! Pum! Quen hai?, Ártika Cía.
38	Rato Pérez, A Xanela do Maxín
39	Rogelio III (La fête), Assircópatas
40	Romeo e Xulieta. O espectáculo definitivo, Mutismoa Teatro
41	Run Baby Run, Meninas Teatro
42	Sobre o extravío ou a arte de perderse, Furia Sotelo
43	Somos criminais e punto final, Ainé Producións e Condetrespés
44	Territórios de liberdade, Tanxarina, Companhia Certa e CDG
45	Testosterona, Malasombra
46	Tolóptica, Código Azul
47	Un gran plan, Olga Abad
48	Vía Morta, Culturactiva Producións