A MITCFC inaugura a súa 43ª edición

A Mostra Internacional de Teatro Cómico e Festivo de Cangas celebra hoxe o acto oficial de apertura da súa 43ª edición. Será no Auditorio Municipal Xosé Manuel Pazos Varela de Cangas, a partir das 21.00 horas, e o pregón inaugural correrá a cargo de Noemi Rodríguez. Deseguido, abrirase tamén a programación de sala da Mostra, cunha función de El peor espectáculo del mundo… de momento!, de Zanguango Teatro.

Porén, a programación de espectáculos desta edición comezou xa o pasado 21 de xuño, co inicio da programación de teatro de rúa coa estrea absoluta da peza para público familiar O buscador de illas, de Teatro de Ningures, e hoxe pola tarde, ás 19:30 horas, o Auditorio acollerá unha función do espectáculo O arcón de Noa, de Amarelo Cía, tamén para público familiar.O programa de espectáculos e actividades complementarias desta edición da MITCFC desenvolverase ata o vindeiro 5 de xullo, e inclúe propostas de teatro de texto, teatro físico, novo circo e danza, entre outros xéneros, así como espectáculos híbridos que combinan distintas disciplinas artísticas, e manterá unha presenza destacada do teatro de rúa, que volverá ocupar os espazos públicos, achegando as artes escénicas a todos os públicos e reforzando o carácter aberto e participativo do evento.

Nestes días, a MITCFC albergará funcións dun total de 24 espectáculos repartidos en sete escenarios, ademais de diversas actividades paralelas. Este ano serán representadas por primeira vez ante o público en Cangas 6 coproducións, 9 estreas absolutas e 7 estreas en Galicia, nunha programación plural que combina diferentes xéneros e se dirixe a públicos diversos, reunindo artistas e compañías galegas, estatais e internacionais.