A bailarina, actriz e docente porriñesa Janet Novás impartirá na sede galega da SGAE, localizada en Santiago de Compostela, un taller no que compartirá as claves da práctica que desenvolveu como bailarina e performer ao longo da súa traxectoria

Como coreógrafa, Novás explica que dende a práctica da danza entende o corpo “como un lugar arqueolóxico, contedor doutros corpos, e o movemento como a ferramenta que utilizamos para desenterrar as súas capas máis profundas”. Nese senso, o método que emprega para a súa investigación física é “a improvisación guiada desde diferentes lugares”.

No obradoiro, que se desenvolverá do 20 ao 22 de novembro deste ano, proporá “un proceso de escavación a través de distintas fisicalidades para coñecer os materiais que o compoñen: ósos, músculos, fascias, substancias, imaxinarios, sons, ideas, crenzas, emocións, sensacións e toda a sabedoría encarnada”. Avanza que se traballarán “a mirada, a pausa, a escoita e a voz como extremidade invisible, entendendo a independencia das articulacións e as súas conexións”, e que se explorará “o corpo como caixa de resonancia e a súa capacidade para ficcionar, expandirse e reinventarse”.

Para afondar dun xeito máis consciente neste traballo, sinala que se centrará en catro corpos: “físico, enerxético, emocional e sonoro”. A partir diso, e, a través do xogo, buscarase “romper patróns e abrir novas posibilidades que conviden a crear outras leis que respondan ás necesidades e intereses das persoas participantes”, xa que resume que o obxectivo principal deste obradoiro é “espertar a necesidade de descubrir, curiosear, gozar e arriscar sen medo ao erro nin á idea do fracaso, e escoitar a voz interna que nos aproxima ao que somos, máis alá do que cremos ser, e converterse en canle”.

Participación

Datas: 20, 21 e 22 de novembro 2026
Horario:
- Venres 20 de novembro de 16:30h a 20:30h
- Sábado 21 de novembro de 10.00 a 14.00h
- Domingo 22 de novembro de 10.00 a 14.00h
Prazo de inscrición: Ata esgotar prazas
Lugar: Sede SGAE (Salvadas 2. A Parque Vista Alegre. 15705 Santiago de Compostela).
Duración: 12 horas
Custe:
- Socios SGAE : 30 €
- Antigos alumnos: 60€
- Novos alumnos: 80 €