Actualidade

Ourense pecha o Auditorio e deixa sen traballo ás compañías de artes escénicas ata abril

Auditorio de Ourense Covid
Foto de Iñaki Osorio

PUBLICIDADE

O Concello de Ourense pechará o Auditorio Municipal durante o primeiro trimestre de 2021, pospoñendo a programación de espectáculos prevista ata abril, agás para actuacións musicais. O goberno municipal adopta esta decisión alegando “a inviabilidade de ter unha audiencia mínima” e por motivos sanitarios, buscando “aumentar a colaboración para a prevención en medidas fronte á COVID-19”.

Os responsables municipais creen que o peche perimetral decretado esta semana, co máximo nivel de restricións, impediría que “a cidade recibise público de concellos limítrofes, xa que asistir a espectáculos non é causa de permeabilidade xustificada”. Deste xeito, non haberá  programación de danza ou teatro no Auditorio de xaneiro a abril, pero si programación musical con dous concertos do ciclo Enclave de Cámara.

Esta decisión súmase ás dificultades do sector dos espectáculos nos últimos meses, no que vén sufrindo cancelacións e aprazamentos. Unha situación crítica para un sector que, coa COVID-19, “afecta máis á cultura que a outros ámbitos económicos”, como sinala o Observatorio da Cultura Galega.

A previsión dos responsables municipais sería a de retomar a programación a partir do mes de abril “se o panorama cambiase” pero se xustifican afirmando que o Teatro Principal, xestionado pola Deputación de Ourense, xa “cobre perfectamente a demanda na cidade. O que desde o Concello non imos facer é duplicar a oferta da cidade nunha época de restricións absoluta”. A programación cultural do Concello de Ourense, “seguirá sendo a locomotora cultural principal da cidade e provincia”, afirman os responsables, que consideran demostrada neste Nadal “cunhas luces espectaculares, un innovador bus musical pioneiro en Galicia, e a recepción real (cabalgata estática de luxo)”.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!