O FETEGA, Festival do Teatro Galego do Carballiño outorga o Premio de Honra Dorotea Bárcena 2022 a Eduardo Rodríguez Cunha “Tatán”.
A entrega será na clausura do festival, o venres 9 de setembro no Carballiño. O festival sinala a ampla traxectoria de Tatán, con 39 anos nos que comezou como marionetista e se converteu nun referente do teatro de obxectos en Galicia, fundador, entre outras de Tanxarina Teatro en 1983.
Co recoñecemento persoal a Tatán, o FETEGA quere extender o recoñecemento ao teatro de títeres e esta arte escénica en específico. “Destacamos a versatilidade dun home que tamén se ten desenvolto coa excelencia da profesión como actor enriba dos escenarios e diante das cámaras cinematográficas”, afirman dende a organización.
Tatán, un ano de recoñecementos
No ano no que se conmemoran os 40 anos da compañía Tanxarina Títeres, son varios os recoñecementos que Eduardo Rodríguez Cunha “Tatán” ten recibido. Recentemente, a Mostra Internacional de Teatro de Ribadavia outorgou o Premio de Honra da MIT 2022 ao actor.
O artesán dos monicreques é o fundador desta compañía de referencia dos títeres de Galicia. Xunto con Kukas, Cachirulo ou Viravolta, Tanxarina construíu a partir dos anos 80 unha gran tradición e público afeccionado á arte dos obxectos animados, tanto a través de creacións propias, na organización de festivais coma na divulgación dun oficio entre o artesanal e o experimental.
