Este xoves, 14 de maio, ás 20h30, no Auditorio Municipal Gustavo Freire de Lugo, ALÓproducións re-estrea o espectáculo titulado Do reino (e) dos amores proscritos. Unha viaxe á Idade Media máis colorida.
Unha peza teatral que pon en escena os trobadores da ría de Vigo, Martín Códax, Mendiño e Xoán de Cangas, interpretados por Henry Vidal, músico cubano-galego especializado no repertorio medieval, que vai acompañarse por instrumentos de época para evocar aquel período de esplendor da lingua galega, no século XIII.
O espectáculo, con dramaturxia e dirección de Afonso Becerra de Becerreá, é conducido por Ana Carreira Varela, que oficia de mestra de cerimonias. Como narradora oral, Ana Carreira, vai utilizando o rexistro documental e o do conto para evocar e invocar ás orixes de Galicia, remontándose aos primeiros poboamentos do Noroeste Peninsular, pasando pola lenda dos Celtas, polos séculos de romanización e recuncando no primeiro reino de Europa: o Reino de Galicia, até chegar ao século XIII co esplendor da lingua galega e o tesouro das cantigas. Así pois, Do reino (e) dos amores proscritos recolle as orixes da lingua e da cultura galegas.
Nesa especie de “tapiz medieval” contémplanse as historias das primeiras raíñas, Sancha e Urraca, ás que dá corpo a actriz Isabel Risco, as historias de artistas, como os mencionados trobadores, pero tamén xograresas e soldadeiras, como María Leve e Sancha Pérez, quen, ademais, foron parella amorosa, e que teñen unha placa de homenaxe lembrándoas na Rúa da Moeda Vella, ao lado da Catedral de Santiago de Compostela.
O amor alén das predeterminacións hetero-patriarcais aparece tamén representado na historia de Pedro Díaz e Munio Vandílaz, que casaron en 1061, citando algúns outros casos que ofrecen unha visión diferente da Idade Media, grazas ás investigacións de Carlos Callón, cuxo libro Vidas e historias LGBT da Idade Mediaaparece citado no espectáculo.
Historias de amor para todos os públicos porque se abordan desde os debuxos animados, nunha actualización contemporánea do estilo dos gravados e iluminacións dos códices medievais, a través do seu movemento nunha pantalla de retroproxección, activadas por Alberte Bello, que é outro dos actores do espectáculo, ademais de responsable de ALÓproducións.
Nesa mesma estética están as raíñas Sancha e Urraca, que locen vestidos como os das bonecas de cartón recortables. Igual que acontece con María Balteira, a xograresa galega a quen até o propio rei Afonso o Sabio lle dedicou dúas cantigas, e coa que remata Do reino (e) dos amores proscritos, reivindicándoa como a primeira profesional das artes escénicas de Galicia.
Ademais do espectáculo, para o que aínda se poden comprar billetes en entradaslugo.es, este venres 15 de maio, no Vello Cárcere de Lugo, ás 20h., van facer a primeira presentación do libro Do reino (e) dos amores proscritos. Unha viaxe á Idade Media máis colorida de Laiovento Edicións, na que participará Afonso Becerra de Becerreá, Ana Carreira Varela, Alberte Bello e Henry Vidal.
A única publicación periódica que ten como obxecto as artes escénicas galegas dende 1983.
