Crítica

El extraño caso de la Marquesa de Vadillo

Xogo e posibilidades

| Vanesa M. Sotelo |

estrañocaso

 

“As cicatrices indican de onde vés pero non cara onde vas”. Abrir posibilidades, buscar, divertir, presentar horizontes a partir das fendas da sociedade… foron sempre algunhas das funcións do teatro. El extraño caso de la Marquesa de Vadillo é unha excusa para xogar e abrir posibilidades. A partir da estrutura do xogo do cluedo, Teatro el Zurdo aposta polo xogo do teatro dentro do teatro e a fusión de realidades: por un lado, a da historia do asasinato da marquesa; por outro, a do traballo actoral e a relación do elenco con ese espectáculo e a súa época.

Luis Crespo asina a dirección dunha peza que xoga á mestura e á ruptura. Para que as convencións funcionen, as claves deben ser expostas con claridade e iso acontece desde que o público entra na sala. En escena, a simple vista, pódese apreciar a convivencia de diferentes espazos que falan tanto do espazo de representación como do espazo da ficción –a da casa da marquesa, os camaríns dun teatro, o set dun documental, o espazo reservado para a música… Esta co-existencia de espazos prepara o terreo para o xogo estilístico e interpretativo no que se recrea a proposta e no que se move con comodidade o elenco –resolvendo con diferente soltura pero tamén con corrección.

O xogo e a vontade de interacción co público queda patente tamén desde o primeiro momento a través das rupturas da cuarta parede, na solicitude de colaboración coreográfica ou na conversa directa coas presentes para contribuír a resolver o crime. Esta interpelación ao público mantense ao longo de todo o traballo, operando como un elemento de distanciamento pero tamén de reactivación que reforza o carácter lúdico da proposta. Rupturas espaciais e temporais sucédense nunha proposta metateatral que explora a interesante fronteira na que se atopan o actor e a construción que podemos chamar “personaxe”, a actriz que presenta a personaxe ou o actor que representa o personaxe. E nesa exploración actoral, atopamos tamén todas as posibilidades de relación que cada unha de nós pode ter coa realidade.

Dentro da ficción, aínda que aparentemente anecdótico, o público atopa tamén a gravación dun documental ficticio que supón un dos valores engadidos ao final do espectáculo. Colocándose nun futuro inmediato, ese documental proporciona un espazo para compartir testemuños e xera un pasado onde xa foi posible recuperar a dignidade e o cambio. Esta opción de epílogo que opta por un plano conversacional indirecto, traslada a memoria dun teatro feito en tempos sombrizos a partir da experiencia dunha compañía de teatro que, facendo un divertimento cheo de efectos, acaba por ofrecer un espello sobre a realidade.

El extraño caso de la Marquesa de Vadillo: varias historias, varios planos de ficción, varios tempos e xogo estilístico. Un espectáculo asentado nunha dramaturxia e nunha execución de “morro fresco e orgánico” que obtivo un aplauso final ben agradecido entre o público da Mostra de Cangas.

 

El extraño caso de la Marquesa de Vadillo de Teatro El Zurdo
Compañía: Teatro el Zurdo
Dirección: Luis Crespo.
Elenco: Nuria Benet, Miguel Barderas, Beatrice Binotti, Roberto Drago, Fernando Otero, Paco Revaliente, Eugenio Gómez, Rebeca Medina.
Texto: Luis Crespo e Felix Estaire coa colaboración de N. Benet e J.R. Fernández.
Dirección Musical: Fernando Lago.
Músico: Grozdan Aleksandrov “Tozo”.
Deseño Gráfico: Cufa.
Vestiario e escenografía: Mónica Borromello e Alessio Meloni.
Axudante de escenografía: Alessio Meloni.
Iluminación: Víctor Cadenas.
Movemento: Markos Marín.

Auditorio de Cangas. Mostra de Teatro Cómico e Festivo de Cangas. 4 de xullo de 2015.

 

 

 

Ficha artística

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos