A concelleira de Acción Cultural do concello de Santiago, Mercedes Rosón, presentou onte o programa “Á escena! Temporada de artes escénicas 2020”, que recolle 27 espectáculos de teatro, danza e circo para o primeiro semestre deste ano. Serán un total de 36 funcións que se desenvolverán no Auditorio de Galicia e no Teatro Principal dende o 16 de xaneiro ata o 4 de xuño. | Foto: Rosinha Rojo / MIT Ribadavia |

 

O programa faise en colaboración coa Rede Galega de Teatros e Auditorios da AGADIC-Xunta de Galicia e cos programas Platea e Danza a Escena do INAEM-Ministerio de Cultura, ademais de co apoio da Deputación da Coruña e o Consorcio de Santiago. Por iso, na rolda participaron tamén, ademais da concelleira e do director-xerente do Auditorio de Galicia, Xaquín López; o director de AGADIC, Jacobo Sutil; e o deputado provincial da Coruña, Xosé Luís Penas.

Dentro dos espectáculos haberá tres estreas absolutas: O mel non caduca, de Ibuprofeno Teatro; Spotlight, de Can Cun Quinqué; e O mozo da última fila, de Redrum Teatro. Participaron na presentación tamén representantes das tres compañías así como representantes de O Montacargas, espectáculo de Ainé Producións & Acusmaser Opus, co que se estrea esta temporada hoxe mesmo e o venres de novo, no Teatro Principal.

Os espectáculos están clasificados nas seguintes liñas temáticas: EscenaGZ, Territorio das Mulleres e Clásicos? Entre eles atopamos desde a diversa abordaxe que nos mostran de Shakespeare dende a comedia física do Hamlet de Chapitô –o 24 de abril–, pasando pola aposta polo grande formato de PT Excéntricas co seu Medida x Medida –o 21 e 22 de febreiro–, ata a proposta máis “clásica” do Macbeth. O ruído e a furia de Estudo Momento –o 15 e 16 de maio–.

Outra das ligazóns mostra un interese polas temáticas que teñen a opresión da muller como protagonista, dende a violencia máis absoluta das propostas de Teatro do Atlántico con A conquista da escola de Madhubai (o 7 e 8 de maio) e El Pavón Teatro Kamikaze con Jauría (o 12 de marzo), ata a falta de liberdade e opresión silenciosa en contextos pechados, familiares, de cotío que nos propoñen Liberto, de Marelas Producións, o 2 e 3 de abril; Ana, también a nosotros nos llevará el olvido, de Unahoramenos –o 13 de febreiro–, ou Mrs.Dalloway, de Entrecajas, o 22 de maio.

O Leira de Nova Galega de Danza (14 de maio) dialoga co Erritu de Kukai Dantza (4 de xuño), unha oportunidade de ouro para poder contrastar como as danzas tradicionais e populares dialogaron coa danza contemporánea en Galicia e no País Vasco. E a relación da música e o movemento está presente en Directo9, de Pisando Ovos (25 de abril), e Mercedes mais eu, de Janet Novás e Mercedes Peón (23 de abril), dúas reflexións sobre a música, os corpos e a creación dende a vangarda absoluta feita en Galicia.

As estreas absolutas serán as de O mel non caduca, de Ibuprofeno Teatro, o 31 de xaneiro e 1 de febreiro; Spotlight, de Can Cun Quinqué, o 5 de marzo; e O mozo da última fila, de Redrum Teatro, o 16 e 17 de abril; a estas hai que sumar a estrea en Galicia de Deje su mensaje después de la señal, de Tanttaka Teatroa, o 18 de abril. Poderase ver tamén O Montacargas, de Ainé Producións e Acusmaser Opus, 16 e 17 de xaneiro; O electo, de Contraproducións, o 23 e 24 de xaneiro; ou o Falar por falar de Volta e Dálle, o 27 e 28 de febreiro. José Sacristán chegará a Compostela o 6 de marzo co seu Señora de rojo sobre fondo gris, de Miguel Delibes; Aitana Sánchez Gijón con Juana da man do Teatro Español e Losdedae, o 28 de marzo; e Matarile Teatro presentará o seu Daimon y la jodida lógica o 14 de marzo.

Ademais, únense outros cinco espectáculos enmarcados tamén no programa En Familia e dirixidos a todos os públicos: o Concerto con fusión de Píscore coa Banda Municipal de Música, o 15 de febreiro; , de Xampatito Pato, o 7 de marzo; a Gran Gala do Circo de Compostela, o 29 de marzo; Lar (la casa, el hogar), de Lasal Teatro, o 23 de maio; e Emportats, de La Trócola Circ, o 30 de maio.

 

Xa á venda

As entradas para todos os espectáculos están xa á venda na web compostelacultura.gal, así como no despacho de billetes do Teatro Principal (que abre de martes a sábado + días de evento de 18:00 a 21:00, ou dende 1 hora e media antes de que comece o espectáculo) e no do Auditorio de Galicia (dende 1 hora e media antes de que comece a función). O prezo das entradas é de 10, 12 ou 14 € (cos descontos habituais do 50% para persoas desempregadas, perceptoras de rendas sociais, xubiladas, maiores de 65 anos, menores de 25 anos, estudantes e membros de familias monoparentais ou numerosas). Para os 5 espectáculos que se enmarcan dentro da programación infantil e familiar, o prezo será de 4 euros a entrada xeral, existindo un Bono familiar mediante o cal se adquiren 4 entradas a 12 euros.

 

#posfunción no Club C!
O Club C! é unha proposta de actividades para se achegar de xeito diverso aos contidos das actividades culturais compostelás. Comprende actividades que buscan coñecer mellor as propostas artísticas que nos ofrece a programación cultural municipal e deste xeito afondar na experiencia como espectadores culturais. Aquí atopamos ata 13 #posfunción nas que, unha vez cae o pano, membros da equipa técnica e artística debaten co público sobre o espectáculo e a súa temática.

 

Xurado Novo Á escena!
Este ano, o Departamento de Cultura de Compostela, xestionado dende o Auditorio de Galicia, pon en marcha por primeira vez o Xurado Novo Á escena!, experiencia que xa se celebrou dúas veces no festival Cineuropa. O obxectivo é achegar ao público máis novo ao teatro e fomentar o seu espírito crítico. Así, un grupo de mozos e mozas de ata 30 anos asistirán ás diversas funcións e participarán nas posfuncións para despois debater entre eles e elas e conformar un palmarés simbólico que se fará público ao final de temporada.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos