Os ósos da memoria
| Iván Fernández |
| Foto: Vicente Romero |
No sin mis huesos é un espectáculo de danza e de creación colectiva de Iron Skulls Co., compañía con sede en Barcelona e gran proxección internacional, que foi presentado en Vigo na fin de semana do 20 de novembro.
A peza xorde da celebración do 400 aniversario da morte de Miguel de Cervantes e, polo tanto, foi estreada no ano 2016. A mente obsesiva, o espazo onírico, os debuxos da vida do autor e as referencias ao Século de Ouro son as bases dende onde xerar unha proposta que mestura o clásico coa xénese da compañía, o B-boying.
Dende o primeiro momento en que a intensidade das luces baixa, sei que estou a mirar un espectáculo que, dalgún xeito, ha traballar co concepto de transcendencia. O xogo lumínico, a música e a súa repetición, a posta en escena, todo marca o transcendente da proposta de Iron Skulls Co.
Un xeito específico no que isto se remarca é a composición de imaxes que acaban semellando cadros, representacións pictóricas e barrocas que nacen do movemento, da éxtase persoal e das estatuas grupais que conforman os corpos dos actores. Outro, os pasos recorrentes, as trazas dos derviches e os bailes místicos, que mesmo lembran aos movementos e danzas sagradas transmitidos por Gurdjieff a comezos do século pasado.
É moi destacable a forma en que se relacionan estes artistas: dun xeito moi pautado e que amosa as diferenzas e variados niveis na composición desta peza, apreciándose claramente no momento en que os performers se collen dos brazos, formando lazos e cordas que remiten ás mesmas sogas coa que comeza o espectáculo, suxerindo ligazóns de apoio e unión máis que de ataduras obrigadas.
Obviamente, todo isto depende na mestría técnica e expresiva do corpo de danza, os seis bailaríns que dan movemento á coreografía e habitan o espazo de soños que propón No sin mis huesos. Mestría que demostran durante a hora que dura o espectáculo, e que nos regalan a modo de bis na rolda de aplausos, o que fai atordar a máis dun coa capacidade acrobática do corpo humano.
No sin mis huesos regresará a Galicia o vindeiro 12 de febreiro, en Pontevedra.
No sin mis huesos, Iron Skulls Co.
Dirección e coreografía: Iron Skulls Co.
Performers: Adrián Vega, Facu Martín, Luis Muñoz, Diego Garrido, Moisés ‘Moe’ & Héctor Plaza ‘Buba’.
Dance Cover: Ugo Boulard.
Música: Willy Barleycorn.
Iluminación: Óscar Gonzalez.
Vestiario: María Zaguirre – ZAGV.
Auditorio Municipal de Vigo. 20 de novembro de 2020.
