in

Colectivo Vacaburra, Javier Martín e Kirenia Danza, próximas coproducións do CCG

O raro é que bailar sexa raro | Ángel Sousa
A Xunta de Galicia impulsará os novos espectáculos de danza de Andrea Quintana, Javier Martín e Kirenia Martínez , adxudicatarios da licitación de tres contratos en réxime de coprodución co Centro Coreográfico Galego (CCG). | Fotografía: Ángel Sousa |

 

Festina Lente de Colectivo Vacaburra, Umbral de Javier Martín e Tres Tristes 2.0 de Kirenia Danza serán as próximas coproducións de danza do Centro Coreográfico Galego. Segundo a adxudicación publicada pola AGADIC na súa páxina web, a Xunta achegará máis de 50.000 euros ás tres propostas, asumindo entre o 50 e o 80% dos seus respectivos orzamentos. Ademais do apoio económico, estas formacións poderán contar coas instalacións do na Coruña para os ensaios previos á súa estrea, prevista entre a primavera e o outono de 2021. A nova, publicada pola Axencia Galega das Industrias Culturais o pasado 7 de decembro, destacaba sobre os espectáculos seleccionados:

 

PUBLICIDADE

Sinerxías creativas

As alianzas artísticas a partir das que xorden os títulos seleccionados son determinantes nos tres casos. Así, o Colectivo Vacaburra é o proxecto común das creadoras Andrea Quintana e Gena Baamonde, que asinarán conxuntamente a dramaturxia de Festina Lente. Esta peza contemporánea buscará propiciar unha reflexión acerca do momento presente a través dunha visión crítica sobre os contextos actuais de desconexión e os factores que inflúen na construción da sociedade.

ocúpase tamén da dirección do espectáculo, mentres que Andrea Quintana se encarga da coreografía e da súa interpretación canda a Clara Ferrao. Acompáñanas un equipo maioritariamente feminino, do que tamén forman parte Cristina Cotelo (espazo escénico), Saturna (vestiario), Esther Quintas (caracterización), Muller6ollos (imaxe gráfica e vídeo) e Galicia Danza Contemporánea (produción xunto a Vacaburra).

PUBLICIDADE

No caso de Javier Martín, contará para a súa nova creación coa colaboración especial na asistencia ao movemento do tamén coreógrafo e bailarín Pep Ramis, codirector da compañía Mal Pelo e do centro de creación e investigación L’animal a l’esquena de Xirona, que acollerá este proxecto en residencia artística.

Para Umbral, o seu creador inspírase nalgunhas das figuras espectrais do acervo cultural galego, desde a Santa Compaña ata as múltiples personaxes do Entroido, para abordar a través da danza contemporánea reflexións que subxacen na nosa cultura máis ancestral. Sabela Mendoza na produción e Octavio Mas na iluminación implícanse de novo nun proxecto de Javier Martín, que contará tamén co vestiario de Cremallera Studio.

 

Nova adxudicación para Kirenia Danza

Pola súa banda, Kirenia Martínez Acosta repite este ano como adxudicataria da convocatoria de coproducións do Centro Coreográfico Galego. Desta volta, foi seleccionada por Tres Tristes 2.0, que levará a escena coa súa compañía, Kirenia Danza. A proposta parte da idea de recuperar a peza contemporánea Tres Tristes Tres, creada en 1999 polo coreógrafo e bailarín Miguel Azcue para a recoñecida formación cubana Danza Teatro Retazos.

Ambos artistas reúnense de novo tras vinte anos para levar ás táboas unha montaxe biográfica e documental que, neste proceso de lembranza, recreará tamén extractos doutras seis coreografías e recuperará o espírito desa época. A bailarina galega Estefi Gómez acompañará en escena a Kirenia Martínez e Miguel Azcue neste proxecto, ao que se suman RTA (espazo lumínico), Babykatze e Bruno Baw (espazo sonoro), Eidos e Idearock (produción) e Arte Estudio Xestión Cultural (distribución).

 

Pódese acceder á nota de prensa completa da AGADIC aquí.

PUBLICIDADE
PUBLICIDADE
Redacción

Redacción

Somos a erregueté | Revista Galega de Teatro.
A única publicación periódica que ten como obxecto as artes escénicas galegas dende 1983.

Deixa unha resposta

Avatar

O teu enderezo electrónico non se publicará Os campos obrigatorios están marcados con *

GIPHY App Key not set. Please check settings

    Festival Pequeártiko Migallas Teatro Contos nas orellas

    VI Festival Pequeártiko: un Nadal para os máis pequenos na Sala Ártika de Vigo

    Colectivo Glovo

    Xornadas de danza en Lugo