O Colectivo Glovo vén de facer pública a resolución das propostas seleccionadas para a nova edición do programa de residencias artísticas e de investigación Atopémonos Bailando 2025, que ten unha marcada proxección internacional e unha forte compoñente colaborativa.
O programa, impulsado por Colectivo Glovo e a Área de Cultura, Turismo, e Promoción da Lingua Concello de Lugo, coa colaboración da Xunta de Galicia a través da Agadic, é unha iniciativa que quere “consolidar Lugo como un punto de encontro para a investigación e creación en danza contemporánea”.
Nesta edición, a cuarta na historia das residencias, medrou o número de proxectos seleccionados e o abano xeográfico dos seus intercambios, sumando novos aliados institucionais no eido nacional e internacional. A convocatoria, dirixida a artistas e compañías das artes do movemento, recibiu propostas procedentes de toda España e Portugal, e culmina cun total de 11 proxectos seleccionados que se desenvolverán ata novembro de 2025. Entre as novidades desta edición, destaca a incorporación do Festival LABO XL (Donostia / San Sebastián) como novo espazo de intercambio dentro do Estado, sumándose aos xa consolidados Taller Nacional de Danza de Costa Rica, teatromosca (Sintra, Portugal), Teatro Experimental Flaviense (Chaves, Portugal) e Quinzena de Dança de Almada.
Os 11 proxectos seleccionados abranguen unha ampla diversidade de perfís, estéticas e procedencias. Desenvolveranse entre o Museo Interactivo da Historia de Lugo – MIHL e os espazos internacionais colaboradores. Todas as residencias inclúen, ademais, accións de mediación cultural abertas á cidadanía lucense “como parte do compromiso de retorno social do investimento público”.
Artistas seleccionados e espazos de residencia
- Ana Caetano · Portugal – Museo MIHL, Lugo
- María de Vicente · Galicia – teatromosca (Portugal)
- La Basal · Madrid – Museo MIHL, Lugo
- Ana Lola Cosín & Lucas García · Asturias – Teatro Experimental Flaviense, Chaves (Portugal
- Xián Martínez · Galicia – Museo MIHL, Lugo
- Natalia Navarro · Madrid – Museo MIHL, Lugo
- Fran Sieira · Galicia – Festival LABO XL, Donostia
- Tania González · Asturias – Museo MIHL, Lugo
- María Ganzaráin & Teresa Magallón · Aragón – Taller Nacional de Danza, Costa Rica
- Jesús Benzal · Madrid – Quinzena de Dança de Almada, Portugal
- Jessica Castellón & Boris Orihuela · Cádiz – Museo MIHL, Lugo
A selección foi realizada por unha comisión profesional formada por representantes das entidades colaboradoras internacionais:
- Alexandrina Martins · Teatro Experimental Flaviense, Chaves (Portugal)
- Pedro Alves · teatromosca, Sintra (Portugal)
- Carlota Machado · Quinzena de Dança de Almada (Portugal)
- Manfred Rivera · Taller Nacional de Danza (Costa Rica)
- Ana Barrantes e Ion Estala · Festival LABO XL (Donostia)
- Erick Jiménez e Maruxa Salas · Plataforma SóLODOS (Costa Rica)
- Esther Latorre e Hugo Pereira · Colectivo Glovo e dirección do programa Atopémonos Bailando
Atopémonos Bailando naceu como “un espazo para apoiar os procesos iniciais de creación na danza, conectando os procesos de investigación coa cidadanía e favorecendo o traballo sostido das compañías”.
O programa estrutúrase arredor de catro grandes eixes:
- Impulso á creación contemporánea: apoiando artistas emerxentes e consolidados cun espazo e tempo de investigación.
- Fomento da cooperación internacional: a través de residencias compartidas e itinerarios de intercambio.
- Proximidade coa cidadanía: mediante actividades de mediación cultural e apertura de procesos ao público.
- Dinamización local e territorial: conectando Lugo cunha rede de centros culturais de referencia dentro e fóra de Galicia.
