A programación, indican desde o Concello vigués, “segue consolidando públicos, a través da diversidade de disciplinas e a variedade de estilos. Unha programación para todos os públicos composta por teatro, danza, bebés e máis circo que nunca”. Compañías galegas coma Voadora, Pedras de Cartón ou Amorodio Teatro, e artistas estatais coma La_Compañía exlímite, Adrián Conde, Yllana ou Zum-Zum Teatre, entre moitas outras, pisarán as táboas do Auditorio vigués.
Os prezos das entradas dos espectáculos para público adulto serán entre 8 e 10 €, e os dirixidos a público familiar de 5 €. A venta de entradas e abonos comezou o pasado xoves 2 de setembro a través da web de Giglon e na libraría Librouro. Os billetes para días soltos poderán adquirirse anticipadamente, sen gastos de xestión, nos devanditos puntos de venda e no despacho de billetes do Auditorio o mesmo día do espectáculo.
