Esta finde semana, do 8 ao 10 de outubro, decorrerá na localidade portuguesa a cuarta edición do festival de teatro amador, promovido polas agrupacións de compañías de Galicia, Castela e León e o Teatro do Noroeste-Cendro Dramático de Viana.
Unha nova edición do Festival Transfronteiriço de Teatro Amador – PLATTA decorrerá esta finde semana de outubro no Teatro Sá de Miranda de Viana do Castelo. O PLATTA forma parte dos tres festivais anuais que se celebran en Zamora (Castela e León), Galicia e Portugal.
Promovido por Teatro do Noroeste – Centro Dramático de Viana na súa cuarta edición, o Festival PLATTA abre con Milagre no Convento de Santa Maria Joana da ATAL (Associação de Teatro Amador de Lanheses), de Viana do Castelo, este venres, 8 de outubro, ás 21.00 h.
Durante todo o sábado, tres grupos de catro actores e actrices de Portugal, Castela e León e Galicia, dirixidos respectivamente por directoras e directores destes lugares, prepararán a lectura dramatizada nas tres linguas da obra premiada no III Premio PLATTA de Teatro Breve: 13 de maio, de Carlos Alves.
Así mesmo, durante esta xornada, celebrarase a reunión da Mesa PLATTA, integrada polos representantes da FETATyL (Federación de Grupos Aficionados de Teatro de Castilla y León), FEGATEA (Federación Galega de Teatro Afeccionado), Teatro de Noroeste -Centro Dramático de Viana-TEIA (Teatro em Inicitativa Associativa) e a erregueté | Revista Galega de Teatro, parceiros e promotores deste festival.
A xornada do sábado rematará, ás 19.00 h, coa compañía La Nómada Teatro, de Salamanca, que representará La Princesa Constante.
O domingo, 10 de outubro, ás 12.00 h, será o momento das Leituras Encenadas do texto de Carlos Alves. A cuarta edición do Festival PLATTA terminará ás 16.00 h coa presentación de Balbordo, de Cavort Teatro, de Santiago de Compostela.
Todos os espectáculos teñen entrada gratuíta, previa recollida na billeteira do Teatro Municipal Sá de Miranda.
