'Hoax Hamlet', de Voadora

PUBLICIDADE

Escenas do cambio, o festival de teatro, danza e arte en acción organizado pola Xunta de Galicia a través da Cidade da Cultura, vén de dar a coñecer a súa programación para este ano. Esta edición concentra en catro días, do 5 ao 8 de maio, unha programación que aposta pola creación, con 14 propostas que transitan a vangarda do teatro, a música, a danza, as artes visuais e a performance e das cales oito son obras orixinais que se poderán ver por primeira vez no festival.

Entre as estreas, o secretario xeral de Cultura, Anxo M. Lorenzo, salientou onte na presentación do programa as cinco novas propostas de artistas e compañías galegas que contaron co apoio da Xunta para o seu desenvolvemento: Hoax Hamlet, de Voadora; a peza colectiva Escenas (Con)Textualizadas, construída coas voces das artistas, actrices e dramaturgas Helena Varela, Helen Bertels, Ana Vallés, Ana Abad de Larriva e Gena Baamonde; e as tres obras froito das residencias artísticas realizadas no Gaiás por Mateo Feijóo, Mercé de Rande e Ramón Souto.

Canda as pezas galegas que terán a súa estrea no festival, o público poderá gozar tamén doutras dúas obras creadas de maneira específica para a súa representación no Gaiás: OUTsideINsideOUTside, a última creación nas fronteiras do teatro e a danza que dirixe a afamada actriz e dramaturga española Sara Molina, e a performance (Raíz de dos), coa que os artistas Nieves Correa e Abel Loureda percorrerán diferentes espazos do Gaiás.

Ademais, Marc Caellas e Esteban Feune de Colombi convidarán o público a compartir unha viaxe moi especial desde a Cidade da Cultura ata Fisterra, froito tamén do seu inspirador paso pola anterior edición do festival: ¿Qué es el agua? é o título desta nova proposta de teatro itinerante da Compañía La Soledad, fundada por ambos artistas en 2011.

Novas experiencias para público e artistas

A directora artística do festival, Lola Correa, avanzou as principais novidades dunha escolma que explora novos lugares e formatos para o encontro entre artistas e público. Nesta edición empregaranse escenarios non convencionais, como a galería de servizos do Gaiás, onde Teatro La Usina representará Waterclose, revisión e actualización do primeiro espectáculo da compañía —Women Closed—, no 20 aniversario da súa estrea, ou tamén os espazos de tránsito e traballo no interior do Museo sobre os que se construirá o percorrido de Escenas (Con)Textualizadas.

Por outra banda, NIHIL, do músico e compositor galego Ramón Souto, propón aos espectadores participar nun concerto na rompente do día desde a cima do Gaiás, e Mateo Feijóo, con Sons do esquecemento ou A navalla do tempo, convídaos a transitar pola memoria, os sons e as imaxes dun pobo do rural galego que representa todo un legado de valores e saberes en perigo de extinción.

As novas experiencias para a audiencia complétanse coa performance MU-Danza, unha muller que camiña, de Mercé de Rande; o ensaio-monólogo mestura de teatro e maxia do galego Miguel Ponce de León en Veneficio (de lo cotidiano o cómo remediarlo), e a Hammamturgia de Societat Doctor Alonso, unha obra coreográfica que se constrúe a partir da transformación constante do espazo, do ambiente e do tempo.

Ademais, no apartado internacional, o festival contará con dous referentes da danza contemporánea chegados de Francia e Portugal. A compañía Man Drake, fundada por Tomeo Vergés, porá en escena dous solos —Que dun bonheur (?) e Moi, Antonio M.— que exploran e cuestionan os contornos do masculino e do feminino. Pola súa banda, a bailarina e coreógrafa portuguesa Tânia Carvalho constrúe en Grasped by Intuition unha peza na que o corpo flúe entre o figurativo e a abstracción lírica.

Homenaxe a María Casares

comezará este ano cun recoñecemento especial a María Casares. A xornada inaugural do festival estará dedicada á actriz galega, coa apertura da mostra María Casares – Pedro Soler. Colliure 1989, que exhibirá no Museo Centro Gaiás obxectos e pezas inéditas dunha das últimas xiras da actriz por Francia, na que estivo acompañada polo guitarrista de flamenco Pedro Soler.

O propio Soler ofrecerá un breve recital nun encontro posterior no que compartirá os seus recordos ao redor de María Casares co recoñecido director de teatro Lluís Pascual, que tivo o privilexio de asistir como espectador a varias representacións da intérprete galega, e con Anne Plantagenet, autora da biografía da actriz baseada na correspondencia amorosa que intercambiou con Albert Camus.

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete ao boletín á newsletter

Recibe no teu email as novas, artigos, entrevistas e contidos da Erregueté para que non perdas unha!