Actualidade

Centro Dramático Galego
Creación propia @erregueté

PUBLICIDADE

Ás 8 da tarde cando morren as nais, de AveLina Pérez, será adaptado pola directora compostelá, mentres que Pazó versionará A peste de Albert Camus. A posta en escena das pezas suporá a contratación de 22 intérpretes, ao abeiro dunha convocatoria que se anunciará este venres no Diario Oficial de Galicia, e un investimento de case 600.000 euros.

O Centro Dramático Galego asume a produción propia de dous novos espectáculos baixo a dirección de Cándido Pazó e de Marta Pazos nunha nova aposta pola dramaturxia galega contemporánea e polos clásicos. Na primeira estrea prevista, unha adaptación d’A peste de Albert Camus, estará á fronte Cándido Pazó. A segunda, Ás 8 da tarde cando morren as nais, será dirixida por Marta Pazos a partir da peza de AveLina Pérez, gañadora en 2018 do Premio Álvaro Cunqueiro para textos teatrais convocado pola Xunta. A posta en escena das pezas suporá a contratación de 22 intérpretes, ao abeiro dunha convocatoria que se anunciará este venres día 16 no Diario Oficial de Galicia, e un investimento de case 600.000 euros.

En liña coas producións deste ano, tamén de adaptación dun clásico, con O charco de Ulises, e de dramaturxia galega contemporánea, con Terceiro acto e Serva me, servabo te, o CDG busca así garantir a pluralidade na escena. Na nova temporada continuará reforzándose o achegamento do teatro á cidadanía, cunha estratexia de distribución que permita implicar ao maior número de persoas posible no territorio galego. A previsión é realizar preto de 80 funcións das novas producións no Salón Teatro e en xira. Avánzase ademais na aposta pola paridade no marco do acordo Temporadas de igualdade MH nas artes escénicas asinado co colectivo Clásicas e Modernas.

A peste

A adaptación de A peste é unha versión teatral da obra de Albert Camus coa que reflexionar sobre o comportamento da sociedade e dos individuos en situacións de crise. Este espectáculo de Cándido Pazó prevé a súa estrea para xaneiro de 2022 e estará en cartel ao longo de oito semanas.

Para a súa representación, a unidade de produción teatral da Xunta contratará 15 intérpretes, tres coa categoría de protagonistas e 12 como principais. Seleccionaranse actores e actrices de diversas e idades e características físicas, xa especificadas na convocatoria publicada hoxe, venres 16 de xullo. En todo caso, unha vez recibidas as propostas e analizadas polo equipo de dirección, poderá haber axustes nos perfís para equilibrar o elenco dentro da proposta artística.

Ás 8 da tarde cando morren as nais

Pola súa banda, Ás 8 da tarde cando morren as nais sitúa o público como centro do espectáculo cunha temática autocrítica e metateatral de gran forza expresiva, chea de humor e de crítica sociolóxica. Coa estrea prevista en abril, estará en cartel seis semanas, ás que se engadirá unha xira a finais de ano.

O espectáculo requirirá da contratación de sete actores e actrices, un como protagonista e os restantes como principais. Os sete roles do proxecto responden á lóxica de creación coral, polo que serán definidos a partir da compensación de perfís entre todos os recibidos. Na selección do elenco primarase a versatilidade e valoraranse a traxectoria e características dos espectáculos representados. Elixiranse tamén algúns perfís con coñecemento e experiencia na creación en disciplinas como a música, a danza, o audiovisual ou as artes plásticas.

A duración dos contratos para as dúas producións será de 3,5 meses, distribuídos entre a segunda metade deste ano, desde a data de comezo dos ensaios, e a fin da exhibición do espectáculo, no primeiro semestre de 2022 no caso de A peste, e no segundo semestre do ano, no de Ás 8 da tarde cando morren as nais.

O proceso de selección constará dunha primeira fase de valoración dos perfís profesionais e, para quen supere esta, doutra de interpretación. As persoas interesadas en optar a estes contratos e cumpran os requisitos establecidos poderán solicitalo presentando o formulario da web da Axencia Galega das Industrias Culturais (AGADIC) no prazo de dez días hábiles a partir do seguinte ao anuncio da convocatoria.

Proceso de selección de 22 prazas de actrices e actores para as producións 2021/2022 do Centro Dramático Galego

Compartir

Share on facebook
Share on twitter
Share on linkedin
Share on whatsapp
Share on email

PUBLICIDADE

PUBLICIDADE

Deixar un comentario

Subscríbete

Recibe as novas, artigos, entrevistas e contidos da Erregueté para que non perdas unha!

erregueté en papelSúmate ao movemento #erreguelove!

Por só 20 euros ao ano recibirás dúas revistas coa edición de textos dramáticos