O Colectivo RPM abre, por quinto ano consecutivo, unha nova convocatoria das Residencias Paraíso para a danza e as artes vivas. O prazo de presentación de proxectos remata o próximo 15 de marzo.
Residencias Paraíso, o programa de residencias artísticas para a danza e as artes vivas impulsado polo Colectivo RPM co apoio da AGADIC e das institucións coprodutoras do programa –Concello de Santiago, o Concello da Coruña, o Concello de Lugo, o Concello de Ferrol, a MIT de Ribadavia, a Vicerreitoría de Igualdade, Cultura e Deporte da UDC e a Fundación Cidade da Cultura-, pretende fomentar na súa quinta edición a aparición de novos proxectos de investigación e creación arredor das novas linguaxes contemporáneas, alimentando o campo de acción da comunidade artística do noso territorio, tanto a que xa existe como a que está por chegar. Normalizar o concepto de residencia artística resulta fundamental para o presente e o futuro das políticas culturais en Galicia, significa atender e respectar o espazo e o tempo adicado á investigación artística, o verdadeiro xerme de todo o que virá.
Nove espazos de residencia
O maior valor do programa de Residencias Paraíso é que sucede grazas a unha rede que atravesa de norte a sur o noso territorio a través da colaboración de espazos de distinta natureza, dende teatros ou centros culturais a espazos non convencionais. As tipoloxías dos distintos espazos favorecen a acollida das diversas fases dun proxecto artístico, dende a investigación, a escritura, o traballo dramatúrxico o a creación coreográfica, ata residencias de carácter técnico.
Este exercicio de diálogo entre todas as partes, impulsores, co-produtores e espazos cómplices, é o que dota dunha identidade tan singular a este proxecto. Esta suma de forzas é capaz de construír esta nova edición do programa para acoller ata 8 proxectos en residencia cun importe total de 20.000 €.
Bases completas das Residencias Paraíso na web do Colectivo RPM.
A única publicación periódica que ten como obxecto as artes escénicas galegas dende 1983.
- O festival de danza e artes do movemento Abanea celebra a súa quinta edición - 09/07/2026
- Sete persoas e entidades foron distinguidas nos IV Recoñecementos de Escena Galega das Artes Escénicas - 07/07/2026
- Moaña acolle a primeira edición do Festival Internacional das Culturas Mar da Illa de Samertolameu - 03/07/2026
